Курбский - История о делах великого князя московского

ИСТОРИЯ О КНЯЗЯ ВЕЛИКОГО МОСКОВСКОГО ДѢЛЕХ:

еже слышахом у достовѣрных мужей и еже видѣхом очима нашима, сие сокращение вмещаючи, яко возмогох, написах великого ради докучания от многих

 

Много крат ото многих свѣтлых мужей вопрошаем бых с великим докучанием, откуды сия приключишася так прежде доброму и нарочитому царю, многажды за отечество и о здравии своем не радяще, и в военных вещах сопротив врагов креста Христова труды тяжкие, и беды, и безчисленные поты претерпѣвающе, и прежде ото всех добрую славу имущему. И многажды умолчах со воздыханием и слезами, не восхотѣх отвещати. // Последи же, частых ради вопрошений, принужден бых нѣчто и отчасти рещи случаев приключшихся таковых, и отвѣщах им: «Аще бы изначала и по ряду рекл, много бы о том писати, яко в предобрых руских княжат род всеял диявол злые нравы, наипаче же женами их злыми и чародѣиницами, яко и во израилтеских царѣх, паче же которых поимавали ото иноплемянников». Но и сия вся оставя, нѣчто изреку о том самом настоящем.

Яко глаголют многие премудрые, доброму началу и конец бывает добр, такоже и сопротив злое скончавается, а наипаче от самовластнаго человеческого естества, злым произволением и по всему супротивным против Божиих заповедей дерзати. Князь великий Василий Московский ко многим злым и сопротив закона Божия дѣлом своим и сие приложил [иже писати и исчитати краткости ради книжицы сея невмѣстно], яже достоит воспомянута, зело вкратце напишем // по силе.
Живши со женою своею первою Соломанидою двадесят и шесть лѣт, остриг ея во мнишество не хотящу ани мыслящу о том и заточил в далечайш монастырь, от Москвы болши двусот миль в земли Каргаполской лежащ, и затворити казал ребро свое в темницу зѣло нужную, и уныния исполненую, сирѣчь жену, ему Богом данную, святую и неповинную. И понял себѣ Елену,